இது தொடர்பாக பிரதமருக்கு அவர் எழுதியுள்ள கடிதத்தில் கூறியிருப்பதாவது:
தமிழகத்தின் பாரம்பரிய விளையாட்டான ஜல்லிக்கட்டு, பொங்கல் பண்டிகையின் ஒரு பகுதியாக நடத்தப்படுகிறது. 2 ஆயிரம் ஆண்டுகள் பாரம்பரியம் மிக்க இந்த விளையாட்டு தொடர்பான கருத்துகள் சிலப்பதிகாரத்திலும் இடம் பெற்றுள்ளன. கிராமப்புற மக்கள் தங்கள் வேண்டுதல்கள் நிறைவேறுவதற்காக காளை மாடுகளை கோயில்களுக்கு தானமாக வழங்கியுள்ளனர். மேலும், இந்த மண்ணுக்கே உரிய திடகாத்திரமான காளையினங்களின் மரபணு பாதுகாப்புக்காகவும் ஜல்லிக்கட்டு நடத்தப்படுகிறது. ஆனால், இந்தக் காளைகள் கொடுமைப்படுத்தப்படுவது இல்லை.
இந்நிலையில், கடந்த 2014-ம் ஆண்டு மே 7-ம் தேதி ஜல்லிக்கட்டு போட்டியை உச்ச நீதிமன்றம் தடை செய்தது. இதைத்தொடர்ந்து, மத்திய சுற்றுச்சூழல் மற்றும் வனத்துறையால் வெளியிடப்பட்ட காட்சிப்படுத்தப்படும் விலங்குகள் பட்டியலில் இருந்து காளைகளை நீக்கிவிட்டு, ஜல்லிக்கட்டு போட்டியை நடத்த நடவடிக்கை எடுக்க வேண்டும் என கடந்த 2015-ல் தமிழக அரசு கோரியது.
மேலும், 2015-ம் ஆண்டு ஆகஸ்ட் 7-ம் தேதி ஜெயலலிதா தங்களிடம் அளித்த மனுவிலும், ஜல்லிக்கட்டுக்கான தடையை விலக்கக் கோரியிருந்தார். அதே ஆண்டு டிசம்பர் 22-ம் தேதி அவர் தங்களுக்கு எழுதிய கடிதத்தில், விலங்குகள் வதை தடுப்புச் சட்டத்தில் தகுந்த சட்டத் திருத்தத்தை கொண்டுவர வேண்டும் என கோரினார். ஜல்லிக்கட்டு போட்டியை நடத்தும் வகையில், அவசரச் சட்டத்தை பிறப்பிக்க வேண்டும் என்றும் கேட்டுக்கொண்டார்.
இதன் அடிப்படையில், மத்திய சுற்றுச்சூழல் மற்றும் வனத்துறை, கடந்த ஆண்டு ஜனவரி 7-ல் வெளியிட்ட அறிவிக்கைக்கும், 12-ம் தேதி உச்ச நீதிமன்றம் தடை விதித்தது. இதனால், 2016-ம் ஆண்டும் ஜல்லிக்கட்டு போட்டியை நடத்த முடியவில்லை. தமிழக அரசு சார்பில் தாக்கல் செய்யப்பட்ட சீராய்வு மனுவும் கடந்த ஆண்டு நவம்பரில் உச்ச நீதிமன்றத்தில் தள்ளுபடி செய்யப்பட்டது.
இதைத் தொடர்ந்து, மத்திய சுற்றுச்சூழல் மற்றும் வனத்துறை வெளியிட்ட அறிவிக்கையை எதிர்த்து, தமிழக அரசு உச்ச நீதிமன்றத்தில் மனு தாக்கல் செய்தது. மேலும், காளை மாடுகளை தொந்தரவு செய்யாமல் ஜல்லிக்கட்டு நடத்துவதற்கான சிறப்புத் திட்டத்தையும் தமிழக அரசு அறிவித்தது. ஆனால், இந்த மனு மீதான தீர்ப்பை உச்ச நீதிமன்றம் ஒத்திவைத்துள்ளது.
கடந்த ஆண்டு ஜூன் 14-ம் தேதி ஜெயலலிதாவும், டிசம்பர் 19-ம் தேதி நானும் தங்களிடம் அளித்த மனுக்களில், ஜல்லிக்கட்டு போட்டியை தமிழகத்தில் நடத்தத் தேவையான நடவடிக்கையை உடனடியாக எடுக்க வேண்டும் என்று கோரியிருந்தோம். அதில், காட்சிப்படுத்தப்படும் விலங்குகள் பட்டியலில் இருந்து காளையை நீக்குவது, விலங்குகள் வதை தடுப்புச் சட்டத்தில் திருத்தம் கொண்டு வருவது தொடர்பாகவும் தெரிவிக்கப்பட்டது.
ஆனால், இதுவரை மத்திய அரசு எந்த நடவடிக்கையும் எடுக்கவில்லை. பொங்கல் விழாவுக்கு இன்னும் குறைந்த நாட்களே உள்ளன. பொங்கல் விழாவில் ஜல்லிக்கட்டும் ஒரு பகுதியாக நடத்தப்படும். எனவே, மத்திய அரசு விரைவாக செயல்பட்டு, இந்த ஆண்டு ஜல்லிக்கட்டு போட்டியை நடத்தும் வகையில், அவசரச் சட்டம் பிறப்பிக்க வேண்டும்.
ஜல்லிக்கட்டு விவகாரத்தில், மத்திய அரசு அதிகபட்ச அக்கறை செலுத்தி விரைவில் தீர்வு காண வேண்டும்/ அவசரச் சட்டத்தை பிறப்பிக்க மத்திய சுற்றுச்சூழல் மற்றும் வனத்துறைக்கு தாங்கள் உத்தரவிட வேண்டும்.
இவ்வாறு கடிதத்தில் முதல்வர் தெரிவித்துள்ளார்.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.