இதனால் இந்த தேர்தலில் இதுவரை இல்லாத அளவுக்கு வாக்குப்பதிவு சதவீதம் அதிகமாக இருக்கும் என தேர்தல் ஆணையம் எதிர்பார்த்தது. ஆனால் நேற்று நடந்த வாக்குப்பதிவில் தமிழகம் முழுவதும் சராசரியாக 74 சதவீத வாக்குகள் மட்டுமே பதிவானது. இது கடந்த 2011 சட்டமன்ற தேர்தலை விட 4 சதவீதம் குறைவாகும். அதிகபட்சமாக பாலக்கோடு தொகுதியில் 88.5 சதவீதமும், குறைந்தபட்சமாக மயிலாப்பூரில் 55.2 சதவீதமும் வாக்குகள் பதிவானது. 100 சதவீத வாக்களிப்புக்கு பல்வேறு நடவடிக்கைகள் மேற்கொண்டும் கடந்த தேர்தலை விட இந்த தேர்தலில் வாக்குப்பதிவு சதவீதம் குறைந்ததால் தேர்தல் ஆணையம் அதிர்ச்சியடைந்துள்ளது. வாக்குப்பதிவு சதவீதம் குறைந்ததற்கு பல்வேறு காரணங்கள் கூறப்படுகிறது. குறிப்பாக நேற்று நாகை, திருவாரூர், தஞ்சை, திருச்சி, திண்டுக்கல், திருப்பூர், கோவை, தூத்துக்குடி உள்ளிட்ட பல்வேறு மாவட்டங்களில் பரவலாக மழை பெய்தது.
இதனால் நாகை, திருவாரூர் உள்ளிட்ட சில மாவட்டங்களில் காலையில் வாக்குப்பதிவு சற்று மந்தமாக தொடங்கியது. மழை காரணமாக நகர்புறங்களில் உள்ள வாக்காளர்கள் பலர் வாக்களிக்க ஆர்வம் காட்டவில்லை. மேலும், பல்வேறு வாக்குச்சாவடிகளில் மழைநீர் தேங்கியிருந்தது. மின் தடை ஏற்பட்டிருந்தது. இதனால், வாக்களிப்பதற்காக வந்த பல வாக்காளர்கள் திரும்பிச்சென்றதையும் காண முடிந்தது. தேர்தலையொட்டி நேற்று(திங்கள் கிழமை) அரசு விடுமுறை விடப்பட்டிருந்தது. இதில் வார இறுதி நாட்களான சனி, ஞாயிறு விடுமுறையை தொடர்ந்து திங்கள்கிழமையும் விடுமுறை அளிக்கப்பட்டதால், அரசு, தனியார் நிறுவனங்களில் பணிபுரியும் பலர் சுற்றுலாவுக்கும், சொந்த ஊர்களுக்கும் சென்றுவிட்டனர். அதற்கு ஏற்றார்போல் சென்னை, கோவை போன்ற பெருநகரங்களில் தான் வாக்குப்பதிவு சதவீதம் குறைந்துள்ளது குறிப்பிடத்தக்கது.
இந்த தேர்தலில் சென்னை, கோவை, சிவகங்கை, ராமநாதபுரம், கன்னியாகுமரி மாவட்டங்களில் 60 முதல் 70 சதவீத வாக்குப்பதிவும், திருச்சி உள்ளிட்ட 21 மாவட்டங்களில் 70 முதல் 80 சதவீத வாக்குப்பதிவும், தர்மபுரி, திருவண்ணாமலை, சேலம், நாமக்கல், கரூர், அரியலூர் மாவட்டங்களில் 80 சதவீதத்துக்கு மேலும் வாக்குகள் பதிவாகி உள்ளது. கடந்த தேர்தலை விட தர்மபுரி மாவட்டத்தில் மட்டுமே இந்த தேர்தலில் வாக்குப்பதிவு சதவீதம் அதிகரித்துள்ளது. கடந்த முறை 81.2 சதவீதம் வாக்குப்பதிவாகி இருந்த தர்மபுரி மாவட்டத்தில் இந்த முறை 85 சதவீத வாக்குகள் பதிவாகி உள்ளது குறிப்பிடத்தக்கது.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.