தமிழக முதல்வராக ஜெயலலிதா பதவி வகித்த காலத்தில் அவருக்கு நீர்ச்சத்து குறைபாடு என கூறி, சென்னை, கிரீம்வேஸ் சாலையிலுள்ள அப்பல்லோ மருத்துவமனையில் சிகிச்சைக்கு சேர்த்தனர்.
ஆனால் சுமார் மூன்று மாதங்கள் சிகிச்சை பெற்ற ஜெயலலிதா மரணமடைந்தார். டெல்லி எய்ம்ஸ் மருத்துவமனையில் இருந்து டாக்டர்கள் அப்பல்லோவுக்கு அழைத்துவரப்பட்டு சிகிச்சையளிக்கப்பட்டபோதிலும், அவர் சிகிச்சைக்கு சேர்ந்தது முதல், இறப்பது வரை அப்பல்லோ மருத்துவமனையில்தான் இருந்தார்.
இதேபோல அமைச்சர் எம்.சி.சம்பத், உடல்நலக்குறைவு காரணமாக கடந்த ஜனவரி மாதம் அப்பல்லோவில் சிகிச்சைக்கு சேர்க்கப்பட்டு, பிறகு நலம் பெற்றார். ஜெயலலிதா மறைந்த ஒரு மாதத்திலேயே சம்பத், அப்பல்லோவில் சிகிச்சைக்கு சேர்ந்து உடனடியாக உடல் நலம் தேறினார்.
முன்னாள் முதல்வர் ஓ.பன்னீர்செல்வம், உடல் உபாதைகள் ஏற்பட்டால், கோவையிலுள்ள தனியார் மருத்துவமனையில் ஆயுர்வேத சிகிச்சை எடுப்பதை வழக்கமாக கொண்டுள்ளார்.
சூப்பர் ஸ்டார் என்று ரசிகர்களால் அழைக்கப்படும் ரஜினிகாந்த், தமிழக அரசியலில் காலடி எடுத்து வைக்க திட்டமிட்டுள்ளதாக தகவல்கள் உண்டு. ஆனால் அவரும் சிகிச்சை பெற அமெரிக்கா பறக்கிறார். அதிகபட்ச சிகிச்சை தேவைப்படும்போது சிங்கப்பூர் மருத்துமனையில் அனுமதிக்கப்பட்டிருந்தார்.
இந்த நிலையில், சபாநாயகர் தனபால் ரத்த அழுத்த பிரச்சினை காரணமாக, சென்னை அப்பல்லோ மருத்துவமனையில் சிகிச்சைக்காக சேர்க்கப்பட்டுள்ளார். அவருக்கு பதில் துணை சபாநாயகர் பொள்ளாச்சி ஜெயராமன்தான் இன்று சட்டசபையை நடத்தினார்.
ஆளும் கட்சியினர் மட்டுமல்ல, கண் உபாதையால் பாதிக்கப்பட்டுள்ள, எதிர்க்கட்சி தலைவர் மு.க.ஸ்டாலினும், சென்னையிலுள்ள சங்கர் நேத்ராலயா மருத்துவமனையில்தான் சிகிச்சை பெற்றார். முன்னாள் எதிர்க்கட்சி தலைவரும், தேமுதிக தலைவருமான விஜயகாந்த், சென்னையிலுள்ள மியாட் மருத்துவமனையில் சமீபத்தில் 10 நாட்கள் தங்கி சிகிச்சை பெற்றார்.
இப்படி தனியார் மருத்துவமனையில் மட்டுமேதான் அரசியல்வாதிகள் சிகிச்சைக்கு சேர்க்கப்படுகிறார்கள். ஆனால் மறுபக்கம், அரசு மருத்துவமனைகளில் சிறப்பாக சிகிச்சையளிக்கப்படுவதாக அதே அரசு தெரிவிக்கிறது. திமுக காலத்தில் கட்டப்பட்ட சட்டசபை கட்டிடத்தை மல்டி ஸ்பெஷாலிட்டியாக மாற்றியது ஜெ. தலைமையிலான அதிமுக அரசு. ஆனால், அப்படி பிடிவாதமாக மாற்றப்பட்ட, உயர்தர மருத்துவமனை என அரசால் சர்டிபிகேட் கொடுக்கப்பட்ட மருத்துவமனையில் கூட யாரும் சேரவில்லை.
கக்கன் போன்ற அரசியல்வாதிகள், மக்கள் பணம் வீணாககூடாது என்பதை வாழ்வின் கொள்கையாக வைத்திருந்தனர். ஆனால், இப்போதைய அரசியல்வாதிகள் தனியார் மருத்துவமனைகளில் பணத்தை வாரி இறைத்து வருகிறார்கள். மறுபக்கம் அரசு மருத்துவமனைகளின் தரத்தை உயர்த்துவது பற்றியும் நடவடிக்கை எடுக்கவில்லை.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.