கண்ணமங்கலம் அருகே பயங்கரம் : ராணுவ அதிகாரியின் மனைவி பலாத்காரம் செய்து கொலை

Share on Whatsapp

திருவண்ணாமலை மாவட்டம் கண்ணமங்கலம் அடுத்த காட்டுக்காநல்லூர் அருகே உள்ள ராமசந்திராபுரம் கிராமத்தைச் சேர்ந்தவர் சங்கர் (45). ராணுவ அதிகாரி. இவரது மனைவி காந்தரூபி (40). மகன் சக்திவேல்(16). இவர் பிளஸ் 1 படித்து வருகிறார். சங்கர், அசாம் மாநிலத்தில் வேலை செய்து வருவதால் காந்தரூபி மகனுடன் வசித்து வந்தார். நேற்று முன்தினம் மாலை சக்திவேல் வழக்கம்போல் டியூசன் சென்றுவிட்டு இரவு வீடு திரும்பினார். அப்போது, வீட்டின் கதவு திறந்து கிடந்தது. உள்ளே சென்று பார்த்தபோது வீட்டில் இருந்த பொருட்கள் ஆங்காங்கே சிதறி கிடந்தன. சமையல் அறையில் காந்தரூபி ரத்தக்காயங்களுடன், நிர்வாணமாக இறந்து கிடப்பதை கண்டு கதறினார்.

தகவல் அறிந்து கண்ணமங்கலம் போலீசார்  விரைந்து சென்று விசாரணை நடத்தினர். விசாரணையில், காந்தரூபி தனியாக இருப்பதை நோட்டமிட்ட மர்ம ஆசாமிகள் வீட்டினுள் புகுந்து அவரை பாலியல் பலாத்காரம் செய்து கொன்றுவிட்டு, பீரோவில் இருந்த 70 சவரன் நகைகள், ₹50 ஆயிரம் ஆகியவற்றை கொள்ளையடித்து சென்றது தெரியவந்தது. தடயங்களை அழிப்பதற்காக வீட்டில் மிளகாய் பொடியை தூவிவிட்டு சென்றுள்ளனர். காந்தரூபியின் சடலத்தை போலீசார் கைப்பற்றி வேலூர் அரசு மருத்துவமனைக்கு அனுப்பி வைத்தனர். இதுகுறித்து 2  பேரை சந்தேகத்தின்பேரில்  பிடித்து போலீசார் விசாரித்து வருகின்றனர்.