TN Bandh
விவசாயிகள் பிரச்னை தொடர்பாக, ஏப்ரல் 16-ம் தேதி அண்ணா அறிவாலயத்தில் அனைத்துக் கட்சிக் கூட்டத்துக்கு அழைப்பு விடுக்கப்பட்டது. இந்தக் கூட்டத்தில், விடுதலைச் சிறுத்தைகள் கட்சித் தலைவர் திருமாவளவன், இந்திய கம்யூனிஸ்ட் மாநிலத் தலைவர் முத்தரசன், மார்க்சிஸ்ட் கம்யூனிஸ்ட் மாநிலப் பொதுச்செயலாளர் ஜி.ராமகிருஷ்ணன், காங்கிரஸ் மாநிலத் தலைவர் திருநாவுக்கரசர் உள்ளிட்ட கட்சித் தலைவர்கள் கலந்துகொண்டனர். கூட்டத்தில், 'ஏப்ரல் 25-ம் தேதி மத்திய அரசைக் கண்டித்தும் விவசாயிகளுக்கு ஆதரவாகவும் முழு கடையடைப்புப் போராட்டம் நடத்தப்படும்' என்று அறிவிக்கப்பட்டது. அதற்கான தீர்மானமும் நிறைவேற்றப்பட்டது.
இந்த நிலையில், தி.மு.க சார்பில் மாநிலம் முழுவதும் அறிவிக்கப்பட்டுள்ள முழு கடையடைப்புப் போராட்டத்துக்கு வணிகர்கள், தொழிற்சங்கத்தினர் மற்றும் திரையுலகினர் ஆதரவு தெரிவித்துள்ளனர்.
முழுக் கடையடைப்புப் போராட்டத்துக்கு ஆதரவு தெரிவித்து, நாளை காலை 6 மணி முதல் மாலை 6 மணி வரை சுமார் 55,000 மணல் லாரிகள் ஓடாது என்றும் அறிவிக்கப்பட்டுள்ளது. தமிழ்நாடு மாநில மணல் லாரி உரிமையாளர்கள் சம்மேளனத் தலைவர் யுவராஜ், இந்த அறிவிப்பை வெளியிட்டார்.
இதையடுத்து, வணிகர் சங்கங்களின் பேரமைப்புத் தலைவர் விக்கிரமராஜா, வணிகர் சங்கங்களின் பேரவைத் தலைவர் வெள்ளையன் ஆகியோர் முழு அடைப்புக்கு ஆதரவு தெரிவிப்பதாக அறிவித்தனர். எனவே, தமிழகம் முழுவதும் நாளை கடைகள் அடைக்கப்படுகின்றன. மேலும், தொழிற்சங்கங்களைச் சேர்ந்த ஆட்டோ, சரக்கு வாகனங்களும் நாளை இயங்காது. விவசாயிகளுக்காக நடத்தப்படும் இந்தப் போராட்டத்துக்கு திரையுலகமும் ஆதரவு தெரிவித்துள்ளதால், திரையரங்குகளில் பகல் காட்சிகள் நாளை ரத்துசெய்யப்படுகின்றன. படப்பிடிப்புகளும் நாளை ரத்து செய்யப்படுவதாக நடிகர் சங்கம் அறிவித்துள்ளது.
இந்த முழு அடைப்புப் போராட்டத்தில்... அ.தி.மு.க, பா.ஜ.க, த.மா.கா, பா.ம.க உள்ளிட்ட அரசியல் கட்சிகள் பங்கேற்கவில்லை. இந்த முழு அடைப்புக்கு தமிழக அரசு ஆதரவு அளிக்காத நிலையில், நாளை அரசுப் பேருந்துகளை போலீஸ் பாதுகாப்புடன் இயக்கப்போவதாக போக்குவரத்துக் கழகம் அறிவித்துள்ளது. தமிழகம் முழுவதும் பலத்த போலீஸ் பாதுகாப்பு போடப்பட்டுள்ளது.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.