மார்பிங் செய்து பேஸ்புக்கில் படம் பதிவேற்றம்: ஆசிட் வீசி கொன்று விடுவதாக பெண் வழக்கறிஞருக்கு மிரட்டல் - நெல்லை வக்கீலுக்கு வலை

Share on Whatsapp

கடலூர் மாவட்டம் பண்ருட்டி அருகே கீழக்கொல்லை பகுதியை சேர்ந்தவர் சபீதா (22), பண்ருட்டி நீதிமன்றத்தில் வழக்கறிஞராக பணிபுரிந்து வருகிறார். இவர் முகநூல் (பேஸ்புக்) கணக்கு வைத்துள்ளார். இவரது நண்பர்கள் வட்டத்தில், சில மாதங்களுக்கு முன்பு திருநெல்வேலி மாவட்டத்தைச் சேர்ந்த ஆறுமுககனி என்பவர் இணைந்துள்ளார். இவரும் வழக்கறிஞர் பணி செய்து வருகிறார். முகநூலில் பல்வேறு பதிவுகளை இருவரும் பரிமாறிக்கொண்டதாக தெரிகிறது. இந்நிலையில் கடந்த பிப்ரவரி 14 (காதலர் தினம்) அன்று சபீதாவின் முகநூல் பக்கத்தில் ஆறுமுககனி ஒரு புகைப்படத்தை பதிவேற்றி உள்ளார்.

அதில் ஆறுமுககனியும், சபீதாவும் சேர்ந்து எடுத்துக்கொண்டது போன்ற படம் இருந்தது. இதைக்கண்டு அதிர்ச்சி அடைந்த சபீதா ஆறுமுககனியின் செல்போனில் தொடர்பு கொண்டு ஏன் இவ்வாறு செய்தீர்கள்? என்று கேட்டுள்ளார். இதில் இருவருக்கும் வாக்கு வாதம் ஏற்பட்டது. ஆத்திரமடைந்த ஆறுமுககனி சபீதாவை அசிங்கமாக திட்டினாராம். மேலும் உன் மீது ஆசிட் வீசி விடுவேன் என்று கூறி கொலை மிரட்டல் விடுத்தாராம். இதுபற்றி சபீதா முத்தாண்டிக்குப்பம் காவல்நிலையத்தில் புகார் செய்தார். போலீசார் வழக்குப்பதிவு செய்து, ஆறுமுககனியை கைது செய்வதற்காக நெல்லை விரைந்துள்ளனர்.