அரசு மருத்துவமனையில் கடத்தப்பட்ட பச்சிளம் குழந்தை மீட்கப்பட்டு தாயிடம் ஒப்படைப்பு!

Share on Whatsapp

சேலம் அரசு மருத்துவமனையில் கடத்தப்பட்ட குழந்தை இன்று மீட்கப்பட்டு அதன் தாயிடம் ஒப்படைக்கப்பட்டது. மருத்துவமனையில் இருந்த சிசிடிவியில் பதிவான காட்சிகள் மூலம் குற்றவாளியை கண்டுபிடித்து குழந்தையை போலீசார் மீட்டுள்ளனர்.

சேலம் அருகே நீர்முள்ளிகுட்டை பகுதியை சேர்ந்த லாரி ஓட்டுனர் வெங்கடேஷ் என்பவரின் மனைவி இந்துவுக்கு சேலம் அரசு  மருத்துவமனையில் ஆண் குழந்தை பிறந்தது.  இந்நிலையில் இந்து உறங்கிய நிலையில், அங்கு வந்த  பெண் ஒருவர் அந்த குழந்தையை கடந்த சில தினங்களுக்கு முன்பு கடத்தி சென்றார்.

உடனடியாக மருத்துவமனை நிர்வாகம் மற்றும் காவல்துறையினரிடம் புகார் அளிக்கப்பட்டது. மகப்பேறு பிரிவில் இருந்த கண்காணிப்பு கேமிராவை சோதனை செய்தபோது, கர்ப்பிணி வேடத்தில் வந்த இளம்பெண் ஒருவர் குழந்தையை கடத்தி சென்றது தெரியவந்துள்ளது. அந்த பெண்ணை பிடிக்க சேலம் மாநகர காவல்துறை உதவி ஆணையர் ஜார்ஜ் தலைமையில் தனிப்படை அமைக்கப்பட்டது.

இதையடுத்து, மருத்துவமனையில் இருந்த 26 சிசிடிவி காமிராக்களில் பதிவான காட்சிகள்  மற்றும் அப்பகுதியில் உள்ள செல்போன் டவரின் மூலம் மேற்கொள்ளப்பட்ட செல்போன் தகவல் பரிமாற்றங்கள் உள்ளிட்டவற்றை ஆராய்ந்து கர்ப்பிணி போல் நடித்த அந்த பெண் யார் என்று தேடினர். விசாரணையில் அவர் தருமபுரி மாவட்டம் பாலக்கோட்டைச் சேர்ந்த வெண்ணிலா என்பது தெரிய வந்தது.

இதனையடுத்து அங்கு விரைந்த போலீசார் அந்த பெண்ணிடமிருந்து இன்று குழந்தையை மீட்டனர். பின்னர் உதவி ஆணையர் ஜார்ஜ், சேலம் அரசு மருத்துவமனைக்கு சென்று குழந்தையை அதன் தாய் இந்துவிடம் ஒப்படைத்தார். குழந்தை மீண்டும் கிடைத்த மகிழ்ச்சியில் நெகிழ்ந்த தாய், ஆனந்த கண்ணீருடன் போலீசாருக்கு நன்றி தெரிவித்தார்.
 
தனது குழந்தை மீண்டு வந்ததைக் கொண்டாடும் விதமாக அதன் தந்தை வெங்கடேசும் அவரது  உறவினர்களும் போலீசார் மற்றும் மருத்துவமனையில் இருந்தவர்களுக்கு இனிப்பு வழங்கி மகிழ்ந்தனர்.