ஆன்லைன் மூலம்...
சேலம் மாவட்டம் ஓமலூர் தொட்டியபுரம் பகுதியை சேர்ந்தவர் ராஜன் (வயது 61). இவர் கடந்த மாதம் மாவட்ட போலீஸ் சூப்பிரண்டு அமித்குமார் சிங்கிடம் புகார் மனு ஒன்றை கொடுத்தார். அதில், ஓமலூரில் உள்ள ஒரு வங்கியில் கணக்கு வைத்துள்ளேன். எனது வங்கி கணக்கில் இருந்து ரூ.48 ஆயிரத்து 781 எடுக்கப்பட்டதாக செல்போனுக்கு குறுஞ்செய்தி வந்தது. இது தொடர்பாக வங்கி அதிகாரிகளிடம் கேட்டபோது, ஆன்லைன் மூலம் பொருட்கள் வாங்கியதாகவும், அதற்காக வங்கிக்கணக்கில் இருந்து பணம் எடுக்கப்பட்டிருப்பதாகவும் தெரிவித்தனர்.
ஆனால், நான் ஆன்லைன் மூலம் எந்த பொருட்களையும் வாங்கவில்லை. எனவே, ஆன்லைன் மூலம் நூதன முறையில் பணத்தை திருடியவர்களை கண்டுபிடித்து நடவடிக்கை எடுக்க வேண்டும், என்று கூறியிருந்தார். இந்த புகார் மனு மீது விசாரணை நடத்துமாறு மாவட்ட குற்றப்பிரிவு போலீசாருக்கு போலீஸ் சூப்பிரண்டு உத்தரவிட்டார். அதன்பேரில் துணை போலீஸ் சூப்பிரண்டு சுப்பிரமணி, சப்–இன்ஸ்பெக்டர் உஷாராணி ஆகியோர் வழக்குப்பதிவு செய்து விசாரணை நடத்தினர்.
வாலிபர் கைது
விசாரணையில், ராஜன் கடந்த மாதம் ஓமலூர் பகுதியில் உள்ள ஒரு ஏ.டி.எம். மையத்தில் பணம் எடுத்து விட்டு, ரசீதை அங்கே போட்டு சென்றுள்ளார். அதை அவருக்கு பின்னால் நின்ற ஒருவர் எடுப்பது சி.சி.டி.வி. கேமராவில் முகம் பதிவாகி இருந்தது தெரியவந்தது. மேலும் அவர் அங்கு பணத்தை எடுத்துள்ளார். இதையடுத்து போலீசார் அந்த நபர் பயன்படுத்திய ஏ.டி.எம். கார்ட்டை கண்டறிந்து அதன் மூலம் பெயர் முகவரியை கண்டுபிடித்தனர்.
அதில் அவர், தொளசம்பட்டி அருகே உள்ள கோவிலூர் பகுதியை சேர்ந்த பெரியசாமி (30) என்பது தெரியவந்தது. இந்தநிலையில் நேற்று பெரியசாமியை மாவட்ட குற்றப்பிரிவு போலீஸ் சப்–இன்ஸ்பெக்டர் உஷாராணி கைது செய்து விசாரணை நடத்தினார். இதில், ரசீதில் இருக்கும் நம்பர்களை தனது கூட்டாளியான மதுரையை சேர்ந்த ஆசாமி ஒருவருக்கு தெரிவித்தும், அதை வைத்து கணினி மூலம் ஆன்லைனில் பொருட்களை வாங்கி மோசடியில் ஈடுபட்டதும் தெரியவந்தது. பின்னர் பெரியசாமியை போலீசார் சிறையில் அடைத்தனர்.
கூட்டாளிக்கு வலைவீச்சு
மேலும், அவரது கூட்டாளியை போலீசார் வலைவீசி தேடி வருகிறார்கள். ஏ.டி.எம். மையத்தில் பணத்தை எடுத்துவிட்டு ரசீதை அங்கேயே போட்டு விட்டு செல்ல வேண்டாம் என பொதுமக்களுக்கு போலீசார் வேண்டுகோள் விடுத்துள்ளனர்.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.