கனிமொழியின் பிரசார வியூகம் பற்றி நம்மிடம் விரிவாகப் பேசிய தி.மு.கவின் முக்கிய நிர்வாகி ஒருவர், " கலைஞரும் ஸ்டாலினும் வாக்காளர்கள் மத்தியில் தீவிரமாகப் பிரசாரம் செய்து வருகின்றனர். இதுதவிர, கனிமொழிக்கென்று தனியாக பிரசார வாகனம் ஒதுக்கப்பட்டுள்ளது. வேட்பாளர்களை ஆதரித்துப் பேசுவது என்ற பொதுவான விஷயத்தையும் தாண்டி, சில விஷயங்களை அவர் செய்கிறார். பிரசாரத்தில் கிடைக்கும் ஓய்வு நேரங்களில் சாதி சங்க பிரமுகர்களிடம் பேசுகிறார்.
அண்மையில் நெல்லை மாவட்ட பிஷப்புகளை சந்தித்துப் பேசினார். அவர்களிடம், 'சிறுபான்மையினத்தவர் நடத்தும் கல்வி நிறுவனங்களுக்கு அனுமதி பெற்றுத் தந்தது, சலுகைகள் அளிப்பது என எங்கள் ஆட்சியில் நிறைய செய்திருக்கிறோம். இந்தமுறை உங்கள் தேவாலயங்களில் கூடும் மக்களிடம், எங்களுக்கு மொத்தமாக ஓட்டுப் போடுமாறு அறிவுறுத்துங்கள்' எனப் பேசினார். 'வரும் ஞாயிற்றுக்கிழமை அன்று இதுதொடர்பாக, மக்களிடம் வேண்டுகோள் வைப்பதாகவும்' அவர்கள் உறுதியளித்தனர்.
இதேபோல், ஸ்ரீரங்கத்தில் பழனியாண்டி என்பவர் தி.மு.க வேட்பாளராக களமிறங்குகிறார். அவர் மூலமாக முத்தரையர் சமூகத்து தலைவர்களிடம் பேசிய கனிமொழி, 'அ.தி.மு.க ஆட்சியில் உங்கள் சமூகத்திற்கென்று எந்த பிரதிநிதித்துவமும் கிடைக்கவில்லை. உங்களை எல்லாம் ஒதுக்கியே வைத்திருந்தார் ஜெயலலிதா. எங்கள் ஆட்சியில் அதிகாரம் இப்படி ஒரே இடத்தில் குவிக்கப்பட்டதில்லை. அதை உணர்ந்து உதயசூரியனுக்கு வாக்களியுங்கள். நிச்சயம் நல்லது செய்வேன்' என வாக்குறுதி அளித்தார்.
தவிர, நாடார்கள் மத்தியில் பேசும்போது, 'உங்கள் சமூகத்திற்கு இந்த ஆட்சியில் என்னென்ன கொடுமைகள் இழைக்கப்பட்டது என்று நான் சொல்ல வேண்டியது இல்லை. சட்டமன்றத்திலேயே பெருந்தலைவர் காமராஜரை அவமானப்படுத்தினார் ஜெயலலிதா. அவரது கல்வி நாளைக்கூட அ.தி.மு.க அரசு கொண்டாடவில்லை. எங்கள் ஆட்சியில் இப்படி நடந்ததுண்டா? என்பதை மட்டும் யோசியுங்கள்' என உருக்கமாக பேசியுள்ளார்.
தருமபுரியில் கனிமொழிக்குக் கூடிய கூட்டத்தை யாரும் எதிர்பார்க்கவில்லை. அந்தளவுக்கு மக்கள் கூடியதற்குக் காரணமே, உள்ளூர் வன்னிய சமூகத்து தலைவர்களை வளைத்துப் போட்டதுதான்.
அவர்களிடம் பேசிய கனிமொழி, 'கட்சியிலும் ஆட்சியிலும் உங்கள் சமூகத்திற்கு அதிக பிரதிநிதித்துவம் கொடுக்கப்பட வேண்டும் என்று தலைவரிடம் பேசியிருக்கிறேன். உங்கள் தலைவர்களைக் கைது செய்து சிறையில் அடைத்தது உள்பட எண்ணற்ற கொடுமைகளை ஆளுங்கட்சி உங்களுக்குச் செய்திருக்கிறது. வெற்றி பெறக் கூடிய வேட்பாளருக்கு ஓட்டுப் போட வேண்டும் என்றால், தி.மு.கவுக்குத்தான் நீங்கள் வாக்களிக்க வேண்டும். நீங்கள் எதிர்பார்க்கும் அனைத்து விஷயங்களையும் தலைவர் செய்வார்' என உறுதிமொழி கொடுத்திருக்கிறார்.
தமிழகம் முழுவதும் பெரும்பான்மை சாதி சமூகங்களைத் தேடிப் போகிறார் கனிமொழி. அவரது சாதி வியூகம் எப்படிக் கை கொடுக்கப் போகிறது என்பது தேர்தல் முடிவுகளில் தெரிந்துவிடும்.
No comments:
Post a Comment
வாசகர்களுக்கு ஓர் அன்பான வேண்டுகோள் :
1. செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
2. ஏற்கனவே பதிவு செய்யப்பட்ட கருத்துகளையும் விமர்சிக்கலாம். ஆனால் தனிப்பட்ட முறையில் எவரையும் விமர்சிக்காமல், கருத்துக்கள் மற்றும் செய்திகளை மட்டுமே விமர்சிக்க வேண்டுகிறோம்.
3. அவதூறான வார்த்தைகளுக்கோ, ஆபாசமான வர்ணனைகளுக்கோ இங்கு இடம் இல்லை. அத்தகைய கருத்துகள் தணிக்கை செய்யப்பட்டே வெளியிடப்படும்; அல்லது முற்றிலுமாக நிராகரிக்கப்படும். இந்த பகுதியில் வெளியாகும் வாசகர்கள் கருத்துக்கள் அவர்களுடைய கருத்துக்களே.